Domenica, 20 Luglio 2008 00:00

Pil e Contrupilu

Scritto da  Enzo Colacino

‘A vita è bella ppecchì, quandu ‘e  ‘na parta t’arriva ‘na notizza brutta, subitu ppe’ ‘a par condiciu ti nd’arriva n’atra cchi ti fa allargara u cora e ti fa scordara tutti i sofferenzi!

L’atra jornu a la televisiona c’èranu tutti i varbèri e i parruccheri in agitaziona ppecchì u governu dissa ca in Italia u  Pil non crìscia finu a tuttu u 2009 e quindi, puru iddhi, èranu preoccupati ca restavanu disoccupati e ccu problema ‘e comu avìanu ‘e arrivara a chiddhu famosu fina ‘e misa cchi tanta tristezza portau a lu Governu…,

Mentra tutta ‘a categoria era impegnata ppe’ comu avìa ‘e fara nomma cci s’arrùzzanu i fòrbici… eccu ca t’arriva ‘a notizza cchi fa rallegrara l’Italia: U Presidenta d’o Consigliu in persona cchi ti fa sapira ca u Milan s’accattau a Ronaldignu.

Chissi su’ notizzi…..T’u futti ca non crìscia u PIL?...Peccatu ca ‘a campagna elettorala finiu sinnò u sa comu avera sagghjutu ancora l’indicia ‘e gradimentu?

Letto 89835 volte Ultima modifica il Venerdì, 30 Novembre 2012 16:44