Martedì, 20 Ottobre 2009 00:00

Nu veru capisciatura....

Scritto da  enzo Colacino

Non volera ‘ma mi sbagghju, ma, a lu ministru Tremonti, si propriu non u ponnu candidara ppe’ nu premiu Nobel, quantu menu ‘na nominescion ppe’ ‘a scoperta ‘e l’acqua cadda cci ‘a ponnu fara….Eh, non è ca càpita tutti i jorni ppemma a n’esponenta d’o Governu in carica e per giunta Ministru d’e Finanzi, cci vènanu a menta idei comu chiddha cchi eppa l’atru jornu….. Il posto di lavoro fisso è meglio del lavoro precario…..Cchi cerbeddhu ah? Ma cci penzati ? Macari cci su’ nu saccu d’economisti chjusi d’e anni nt’a càmbari chjini ‘e fumu cchi pènzanu notta e jornu comu hannu ‘e risorbira u problema d’o postu ‘e lavoru, ed iddhu nt’a nenta ebba n’idea cchi ficia u giru d’o mundu comu nu lampu…….Già s’eppa ‘e sorbira nu cazziatuna ‘e Berlusconi cchi cci dissa: “ ‘A prossima vota cchi ti vena n’idea ‘e chissi m’a dici prima a mia ca vogghju ppemma ‘a lanciu eu ca sugnu u capu toi, accussì mi s’za u consenzu, armenu chiddhu….. E poi non era u momentu, datu ca ancora u dialugu politicu era concentratu subba e mia e subba i cosi cchi fazzu eu.” Non sapimu si a Tremonti cci càccianu ‘a delega ‘e ministru o cci futtanu sulu u portafogliu, ma certu sarà pedinatu, spiatu notta e jornu, e specialmenta ‘e cchi culura si minta i cozetti, e appena u vìdanu cchi si minta ‘na manu a la frunta nèscianu fora ccu u registratora e cci dinnu: “Vi vinna n’idea? Ca cci ’a portàmu subitu a lu Presidenta”. Chissi su’ i perzuni cchi pòrtanu avanti l’economia ‘e ‘na naziona, basta n’idea e ti cangia ‘a vita…! T’i futti tutti chiddhi metalmeccanici, operai, muratori, precari operatori e colsenter genti in cassa integraziona, senza nu postu fissu e disoccupati cchi idei ponnu avira?.....

Letto 54128 volte