Mercoledì, 30 Settembre 2009 00:00

Menu mala ca c’è u Dow Jones…sinno’…..

Scritto da  Enzo Colacino
Vota questo articolo
(0 Voti)

‘A sira a la televisiona i programmi ‘e politica ncumìncianu ccu ‘a promessa ca s’hannu ‘e vasciara i toni e poi finìscianu ccu gridati cchi i peju mercati d’o piscia si sònnanu. Pàssanu nu pocu ‘e jorni e, quandu para ca l’ànimi si stannu carmandu, eccu ca ti nèscia u Presidenta d’o Consigliu ccu n’atra sparata d’e soi cchi fa partira n’atra sequela ‘e “dissi eu e dicisti tu”.

Chiddhu cchi è stranu è ca tutti i tifosi ‘e Berlusconi, quandu iddhu libera chiddhi strampalatini, cchi poi puntualmenta ritratta comu i megghju fotografi, s’affannanu ppemma u difèndanu dicendu ca è nu simpaticuna, ca volèra ‘na paddha… . Mo cchi para ca c’è nc’unu cchi sa paddha volera ‘ma cci ‘a mina daveru….sunnu tutti in agitaziona nomma cci succeda nc’una cosa. Mo, dicu eu, a parta i scherzi e bandu a la violenza d’e ogni parta e versu chiunqua, ma vi para ca daveru vonnu ‘ma sparanu a Berlusconi? ‘A Storia n’ava dimostratu purtroppu ca tutti o quasi i personaggi cchi, in Italia, hannu morutu tragicamenta ppe’ manu ‘e n’assassinu, furu perzuni cchi hannu combattutu l’ingiustizia, u latroniggiu e ultimamenta ‘a mafia….. On diciti ca potimu stara tranquilli?.... Cchiuttostu chiddhu cchi mi fa stara in penzeru è ca i telegiornali mentra ti dinnu ca a l’Aquila u friddu e ‘a niva cci fa ngrignara i denti a chiddhi cchi su’ ancora sutta i tendi, ca a Giampilieri ancora pulizzanu fangu e cercanu morti, ca ‘a Fao ti comunica ca nu miliardu ‘e perzuni soffra ‘a fama… ca i disoccupati in Italia aumentanu ogni jornu, ti dinnu puru ca a Wall Street il dow jones raggiungia i 10.000 punti e ca Berlusconi u 23 dicembra si minta nu cappeddhu ‘e muratora a la capu e ncumincia u ponta. Non sacciu a Vui, ma a mia d’o Dow Jones cchi guadagna punti e d’o ponta cchi ‘ncumincia sutta i festi ‘e Notala on mi nda futta proooooopriu nenta…..

Letto 157510 volte